Milani “mbreti” i merkatos së janarit në Itali, godet në limite

Të bindësh një lojtar të veshë fanellën kuqezi është gjithmonë e lehtë, pasi historia e Milanit nuk mund të zhbëhet pavarësisht formës jo të qëndrueshme. Këtë e tregoi kjo merkato e janarit, ku me pak financa, ekipi nga Milano arriti të përforcohet në disa reparte, madje edhe me goditje në orët e fundit të merkatos.

I fundit që iu bashkua kampit të Conceição është João Félix, më herët u prezantua sulmuesi Giménez nga Feyenoord, Sottil, apo mesfushori francez Bondo. Janari mund të konsiderohet i suksesshëm për kuqezinjtë dhe këto përforcime duket se janë të goditura, megjithëse gjithçka e tregon fusha e lojës, kur ata të aktivizohen. Félix është padyshim lëvizja më e bujshme, edhe pse në formë huazimi deri në fund të sezonit, ndërsa kushtoi 10 milionë euro.

Duke parë kualitetin e portugezit, vlera në fjalë mund të konsiderohet e justifikueshme nga drejtuesit. Huazimi, por me të drejtë blerje është ai i italianit Sottil, ndërsa 25-vjeçari pritet t’i japë edhe më tepër frymëmarrje ofensivës. Santiago Giménez i kushtoi kuqezinjve 35 milionë euro dhe ka nënshkruar deri në 2029-ën, një sulmues qëndror me shumë potencial, që me gjasa do të kthehet në titullar, sidomos pas largimit të Moratës, megjithëse do të ketë konkurrencën e Abraham. Pra, Milani mund të konsiderohet padyshim mbreti i merkatos së janarit në Serinë A.

LEXONI GJITHASHTU:

• Arbër Hoxha drejt seria A? Sulmuesi kuqezi në radarët e Leçes për merkaton e dimrit
• Kuqezinjtë prezantojnë mbrojtësin, Kyle Walker zyrtarisht pjesë e Milanit