Ministrat evropianë të Mbrojtjes kundër objektivit të shpenzimeve të Trump për NATO

Ministrat e mbrojtjes të Gjermanisë, Francës, Britanisë, Italisë dhe Polonisë, pesë shpenzuesit më të mëdhenj ushtarakë të Evropës, thanë se planifikojnë të vazhdojnë të investojnë më shumë në mbrojtje, por se përmbushja e objektivit të shpenzimeve të NATO-s të presidentit të zgjedhur të SHBA-së, Donald Trump do të ishte e vështirë.

Ministrat u takuan pranë Varshavës të hënën, një javë pasi Trump u kishte bërë thirrje anëtarëve të aleancës ushtarake të shpenzonin 5% të PBB-së për mbrojtjen, nga objektivi aktual prej 2%.

Ky takim, i dyti në një format të sapokrijuar, i nisur pas rizgjedhjes së Trump në nëntor, u fokusua në ruajtjen e mbështetjes për Ukrainën dhe rritjen e prodhimit të saj të armëve vendase, ndërsa liderët evropianë po përgatiten për ndryshime të mundshme në politikën amerikane.

Ministri gjerman i mbrojtjes Boris Pistorius hapi bisedimet duke pohuar angazhimin e grupit për paqen në Ukrainë, në të cilin Kievi ruan sovranitetin mbi të ardhmen e tij. Në Evropë ka shqetësime se Trump mund ta shtyjë Ukrainën të bëjë lëshime të papranueshme ndaj Rusisë.

Ministrat e mbrojtjes diskutuan kërkesën e fundit të Trump për aleatët e NATO-s për të rritur shpenzimet e mbrojtjes në 5% të PBB-së, një nivel aktualisht i pakrahasueshëm me asnjë vend të NATO-s. Polonia, më afër arritjes së objektivit, parashikohet t’i afrohet 5% këtë vit.

Megjithatë, Pistorius vuri në dyshim dobinë e fokusimit vetëm në përqindje.

“Unë thjesht mendoj se një debat statistikor rreth përqindjeve nuk na ndihmon vërtet nëse nuk çon përfundimisht në zbatimin e asaj që NATO ka rënë dakord së bashku, cilat duhet të jenë qëllimet,” tha ai.

Ai vuri në dukje se që Gjermania të ndajë 5% të PBB-së për mbrojtjen do të nënkuptonte shpenzimin e mbi 40% të buxhetit të saj kombëtar, duke e quajtur atë një objektiv jorealist.

Ministri italian i Mbrojtjes Guido Crosetto gjithashtu theksoi shqetësimet e tij.

“Rritja e shpenzimeve të mbrojtjes në një kohë krize ekonomike është më e ndërlikuar se në kohët e tjera,” tha ai.

“Nëse i kombinojmë të dyja, domethënë nëse e bëjmë industrinë evropiane të mbrojtjes një nga mënyrat me të cilat mund të ringjallim ekonominë, ne mund t’i kombinojmë të dyja,” shtoi ai.