Araghchi: Shume vende na janë drejtuar për të diskutuar një kalim të sigurt në Ngushticën e Hormuzit

Ministri i Jashtëm iranian Abbas Araghchi ka deklaruar këtë të diele se Irani është i hapur për të zhvilluar bisedime me vendet që duan të hyjnë në mënyrë të sigurt në Ngushticën e Hormuzit. Ai shtoi se disa prej tyre tashmë janë kontaktuar.

I pyetur nëse Irani mund të lejojë që anijet e naftës dhe gazit të kalojnë përsëri nëpër pikën kritike të bllokimit të energjisë, Araghchi tha se janw të hapur për vendet që duan të flasin me ta për kalimin e sigurt të anijeve të tyre.

“Nuk mund të përmend asnjë vend në veçanti, por na janë afruar një numër vendesh që duan të kenë një kalim të sigurt për anijet e tyre”, tha Araghchi për CBS News por ministri paralajmëroi se ky vendim i takon ushtrisë së Iranit.

“Kjo varet nga ushtria jonë për të vendosur, dhe ata tashmë kanë vendosur të lejojnë, e dini, një grup anijesh që u përkasin vendeve të ndryshme të kalojnë në një mënyrë të sigurt, kështu që ne u ofrojmë atyre siguri për të kaluar”, shtoi ai.

Të shtunën, dy anije cisternë që shkonin drejt Indisë kaluan nëpër ngushticën, e cila zakonisht transporton rreth një të pestën e të gjithë naftës bruto.

Ministri i jashtëm shtoi se Irani aktualisht nuk po kërkon armëpushim apo negociata me SHBA-në për shkak të luftës së vazhdueshme, ndërsa u zotua se është gati të mbrohet për aq kohë sa të duhet.