Ministri i Jashtëm izraelit: Irani do sulmonte qytetarët në Qipro, e parandaluam

Ministri i Jashtëm i Izraelit, Gideon Saar, ka deklaruar se anëtarët e Korpusit të Gardës Revolucionare Islamike (IRGC) të Iranit janë përpjekur të kryejnë një sulm ndaj qytetarëve izraelitë në Qipro. Ai njoftoi se autoritetet e sigurisë të ishullit, në bashkëpunim me shërbimet izraelite të sigurisë, kanë mundur të “pengojnë” sulmin dhe të shmangin një tragjedi të mundshme.

Në një postim në platformën X, Saar theksoi se ky akt ishte pjesë e një strategjie të vazhdueshme të regjimit iranian për të synuar civilët izraelitë, si brenda, ashtu edhe jashtë kufijve të Izraelit.

“Regjimi kriminal iranian po synon qëllimisht civilët izraelitë si në Izrael ashtu edhe jashtë tij,” tha ai, duke e përshkruar tentativën për sulm si një akt të papranueshëm.

Ministri izraelit përfundoi postimin e tij duke theksuar se Izraeli do të vazhdojë të veprojë fuqishëm për të eliminuar çdo kërcënim ekzistencial që mund të paraqitet nga Irani, duke nënvizuar se siguria e qytetarëve izraelitë mbetet një prioritet i padiskutueshëm.

Ky zhvillim ka ngritur më tej shqetësimet për rritjen e tensioneve ndërmjet Izraelit dhe Iranit, duke shtuar frikën për mundësinë e përshkallëzimit të konflikteve në rajon.