Ministri i Mbrojtjes i Finlandës: Mund të anëtarësohemi në NATO para Suedisë

Ministri i Mbrojtjes i Finlandës, Mikko Savola deklaroi se vendi i tij do t’i bashkohet NATO-s pa e pritur Suedinë, nëse pranimi i fqinjit nordik pengohet nga qeveria turke.

Ai tha për Associated Press se Finlanda do të preferonte që të dy vendet t’i bashkoheshin Aleancës së bashku, por nuk do ta pengonte procesin nëse Turqia vendos ta ratifikojë kërkesën për Finlandën, por jo edhe për Suedinë, ashtu siç ka paralajmëruar.

“Jo, jo. Pastaj ne do të bashkohemi”, u shpreh Mikko Savola në një intervistë në margjinat e një konference të sigurisë në Mynih.

Parlamentet e të 30 anëtarëve të aleancës ushtarake duhet të ratifikojnë zyrtarisht kërkesën e Finlandës dhe Suedisë përpara se ato të pranohen në Aleancë. Turqia dhe Hungaria janë dy anëtarët e vetëm të NATO-s që nuk e kanë bërë këtë.

Presidenti i Turqisë, Recep Tayyip Erdogan tha në fund të janarit se Ankaraja mund ta pranojë anëtarësimin e Finlandës, pa Suedinë.

LEXONI GJITHASHTU

• Shefi i NATO-s: Turqia të ratifikojë kërkesat e Finlandës dhe Suedisë për anëtarësim
• Putin nuk mund ta fitojë luftën në Ukrainë, thotë shefi i NATO-s
• Zelensky: Situata në Donetsk dhe Luhansk mbetet jashtëzakonisht e vështirë