Ministri serb i Mbrojtjes: KFOR-i të mos lejojë policinë shqiptare në veri

Ministri i Mbrojtjes së Serbisë, Millosh Vuçeviç deklaroi se situata në Kosovë është e tensionuar, por shpreson se nuk do të ketë përshkallëzim.

Vuçeviç u shpreh se KFOR-i është një faktor i rëndësishëm, i cili nuk duhet të lejojë kryeministrin e Kosovës, Albin Kurtin të dërgojë policë shqiptarë në veri të Kosovës, shkruan RTS (Radio Televizioni Serb).

“Shpresoj që KFOR-i dhe EULEX-i do ta marrin atë rol, sepse do të ishte shumë e rrezikshme nëse Prishtina vendos të dërgojë pjesëtarë të policisë të nacionalitetit shqiptar, nga pjesët e tjera të Kosovës, në veri, për të hyrë në komunat me shumicë serbe“, ai.

Sipas tij, presidenti i Serbisë, Aleksandër Vuçiç, po bisedon me të gjithë aktorët relevantë politikë të bashkësisë ndërkombëtare, ndërsa shefi i Shtabit të Përgjithshëm të Forcave të Armatosura është në kontakt të përditshëm me komandantin e KFOR-it.

Kryeministri i Kosovës, Albin Kurti ka pritur në takim mëngjesin e së martës, liderët e partive opozitare për të diskutuar në lidhje me situatën në veri.

Në Mitrovicën e Veriut, të dielën, është mbajtur një protestë e thirrur nga Lista Serbe për shkak të vendimit të Prishtinës për riregjistrimin e makinave me targa serbe në targat RKS, Republika e Kosovës.

Kjo protestë u mbajt një ditë pas vendimit të Listës Serbe për largim nga të gjitha institucionet e Kosovës.

Zyrtarët serbë në veri të Kosovës më 7 nëntor kanë vazhduar të paraqesin dorëheqjet e tyre në institucionet e Kosovës.

Dhjetë deputetët e Listës Serbe, partisë më të madhe të serbëve në Kosovë, kanë dorëzuar të hënën dorëheqjet e tyre në Kuvendin e Kosovës.

LEXONI GJITHASHTU

• ‘Nuk na tregoi pse i prishi raportet me SHBA’, Haradinaj flet pas takimit me Kurtin
• Albin Kurti takon liderët e opozitës për situatën në veri të Kosovës
• Ka indicie për elementë rusë në veri të Kosovës, thotë ministri Sveçla