Ka indicie për elementë rusë në veri të Kosovës, thotë ministri Sveçla

Ministri i Punëve të Brendshme të Kosovës, Xhelal Sveçla deklaroi se ka indicie për elemente ruse në veri, me qëllim të trazirave dhe përshkallëzimit të situatës.

Në konferencë për media, ai nuk ka mohuar se ka pjesëtarë rusë të përfshirë në atë çfarë po ndodh në veri.

Sveçla deklaroi se për zëvendësimin e policëve serbë të dorëhequr, do të plotësohen të gjitha nevojat.

Sipas tij, situata e sigurisë është e qetë dhe se të gjitha institucionet e sigurisë duke punuar në kapacitetet e nevojshme.

“Ne po përcjellim situatën. Jemi jashtëzakonisht aktivë në mbledhjen e të gjitha informacionece edhe të kësaj natyre. Ka edhe deklarime dhe indikacione se mund të ketë elemente të Rusisë, të cilat janë të interesuara të shkaktojnë trazira, eskalim të situatës atje.

Unë jam i bindur që institucionet e Kosovës në koordinim edhe me partnerët tanë ndërkombëtarë janë të suksesshëm në parandalimin, neutralizimin e çfarëdo ndikimi negativ të kujtdo qoftë në raport me sigurinë atje”, theksoi Sveçla.

LEXONI GJITHASHTU

• Situata në Veri, Kurti fton liderët e opozitës në takim
• Çfarë i kërkon kreu i NATO-s Vuçiç dhe Kurtit
• Tensionet Veri, Kurti: Vuçiç po kamuflon refuzimin e planit franko-gjerman