Ministrja Kushi tregon arsyet e mbylljes së kolegjit turk në Tiranë

Ministrja e Arsimit, Evis Kushi, ka reaguar pas mbylljes së kolegjit turk në Tiranë “Mehmet Akif Ersoy”, një ditë më parë.

Përmes një postimi në faqen e vet zyrtare në Facebook, Kushi thotë se ky vendim është rezultat i konstatimit nga Ministria e Arsimit dhe Sportit të një sërë shkeljeve të legjislacionit në fuqi nga zotëruesit e licencës në fjalë.

Sipas ministres Kushi, kjo shkollë ka nisur procesin mësimor 2022-2023 në një vendndodhje dhe mjedise të tjera, të pamiratuara nga MAS, pra pa certifikimin ligjor përkatës të standardeve të godinës.

Në reagimin e ministres theksohet se ky kolegj nuk i ka plotësuar më tej kriteret ligjore edhe pse nga ana MAS është kryer dy herë verifikimi i tij dhe në kushtet e ushtrimit të veprimtarisë jashtë kritereve përkatëse licenca duhet të revokohet.

“Ministria e Arsimit dhe Sportit në çdo rast ka përgjegjësinë për garantimin e standardeve, sigurisë dhe mirëqenies së nxënësve. Prandaj, në respekt të ligjit dhe në mbështetje të 160 nxënësve dhe të familjeve të tyre, do të marrë të gjitha masat e nevojshme për të transferuar nxënësit në shkolla që përmbushin kriteret dhe standardet e funksionimit. Ndërkohë, Ministria e Arsimit dhe Sportit nënvizon se “Revokimi i licencës në fjalë nuk ka asnjë lidhje me spekulimet e ndryshme rreth shkaqeve të këtij vendimi”, thuhet në reagimin e ministres Kushi.

LEXONI GJITHASHTU:

• Mbyllet kopshti “Turgut Ozal’, drejtuesit akuzojnë qeverinë për vendimin
• Kushi: Së shpejti Abetare e Përbashkët edhe për nxënësit shqiptarë të Malit të Zi