Minutazhi për deputetët në Kuvend përplas maxhorancën dhe opozitën

Seanca plenare e së enjtes ka nisur me debate mes opozitës dhe maxhorancës për reduktimin e kohës në dispozicion për të folur.

Koha e opozitës për të diskutuar në parlament është reduktuar përreth 100 minuta, për shkak të situatës së pandemisë.

Por, ky vendim është kundërshtuar nga opozitarët, të cilët e quajnë “mbyllje goje” dhe  kërkojnë 600 minuta në dispozicion, 10 minuta për secilin deputetet, siç parashikon rregullorja.

Ndërkohë pati edhe një reagim nga kreu i Grupit Parlamentar të Partisë Socialiste, Taulant Balla, i cili u shpreh se do të ketë një reduktim të kohës në kuvend derisa të jenë të vaksinuar të gjithë deputetët.

“Zotërinj jemi në gjendjen e një pandemie botërore. Nuk ka asnjë parlament në Europë që nuk i zhvillon seancat me kohë të reduktuar në sallë. Kuvendi i Shqipërisë me kompetencë që i ka dhënë rregullorja e Konferencës së Kryetarëve, ka përshtatur aktivitetin e vetë”, u shpreh Balla.

Ndërsa, Tritan Shehu propozoi se nuk duhet të futen në sallë deputetët e pavaksinuar dhe në këtë mënyrë deputetët e tjerë do kenë kohë të mjaftueshme për të folur.

Por, debati vijoj më tej edhe mes Lulzim Bashës dhe Eduard Shalsit, ku nuk mungoi një gjuhë e ashpër nga ana e kryedemokratit.