Miratohet me 85 vota pro Komisioni i Posaçëm për raportin e Dick Marty

Kuvendi ka miratuar me 85 vota pro dhe 12 kundër, Komisionin e Posaçëm për raportin e Dick Marty.

Ndërkohë në seancën e sotme plenare Kuvendi ka rrëzuar dekretin e Presidenti Meta për kthimin e ligjit për Policinë e Shtetit. Ky ligj është votuar me 83 vota kundër dhe vetëm 9 pro.

Komisioni i Posaçëm për raportin e Dick Marty përbëhet nga anëtarët e mazhorancës që janë Ulsi Manja, Klotilda Bushka, Adnor Shameti, Alket Hyseni dhe Ermonela Felaj.

Ndërsa, nga opozita parlamentare anëtarë janë Myslim Murrizi, Edmond Stojku, Enver Roshi, Elena Xhina.

Kështu, Komisioni i Posaçëm Parlamentar do të hetojë raportin e Dick Marty, në të cilin theksohet se gjatë luftës së UÇK-së janë kryer krime kundër njerëzimit.

Mes tjerash, Dick Marty në raportin e tij përmend të ashtuquajturën “Shtëpinë e Verdhë” në qarkun e Matit, e cila sipas tij është përdorur për të kryer transplantim organesh. 

Ky komision u ngrit disa javë pasi në Gjykatën e Hagës janë dërguar me akuza për krime lufte ish-udhëheqës të UÇK-së.

Ndërkohë në Shqipëri ka pasur debate dhe sulme publike ndaj kryetarit të Partisë Demokratike, Lulzim Basha, në lidhje me angazhimin e tij në kohën e luftës si këshilltar ligjor në misionin e OKB-së, UMNIK, që u mor me faktimin e krimeve serbe në Mitrovicë.

Lexoni gjithashtu:

Euronews Albania zbardh emrat e anëtarëve të Komisionit të Posaçëm për raportin e Dick Marty