Mitsotakis: Taksa e Iranit për kalimin në Ngushticën e Hormuzit, krejtësisht e papranueshme

Kryeministri grek, Kyriakos Mitsotakis ka bërë thirrje për transport të lirë dhe të sigurt përmes Ngushticës së Hormuzit pasi të përfundojë lufta me Iranin.

“Nuk mendoj se unioni ndërkombëtar do të ishte i gatshëm të pranonte që Irani të ngrejë një “kabinë pagese” për çdo anije që kalon ngushticën”, tha Mitsotakis për CNN.

“Më duket krejtësisht e papranueshme”, theksoi ai.

Greqia ka një nga flotat tregtare më të mëdha në botë për nga kapaciteti i ngarkesave.

Pasi Shtetet e Bashkuara të Amerikës dhe Izraeli nisën sulme në shkallë të gjerë ndaj Iranit më 28 shkurt, sulmet dhe kërcënimet e Teheranit e ndaluan pothuajse plotësisht transportin detar në ngushticë.

Përpara negociatave të planifikuara me SHBA-në sipas armëpushimit, Irani sugjeroi që anijet të tarifohen për kalim të sigurt përmes rrugës ujore.

Presidenti amerikan, Donald Trump ka hedhur idenë se ngushtica mund të sigurohet bashkërisht nga SHBA-ja dhe Irani, megjithëse detajet mbeten të paqarta.

“Një marrëveshje e veçantë ndërkombëtare për ngushticën mund të jetë e nevojshme, por nuk duhet të përfshijë tarifa. Do të vendosnim një precedent shumë të rrezikshëm nëse kjo do të ndodhte për lirinë e lundrimit”, paralajmëroi ai.

Qeveria gjermane ka bërë thirrje gjithashtu për kalim pa pagesë.

“Ngushtica nuk është vetëm në ujërat iraniane dhe rregullohet nga Konventa e OKB-së mbi Ligjin e Detit. Prandaj, është e nevojshme që të sigurohet transporti detar falas, i sigurt dhe pa pagesë sapo të rifillojë trafiku, tha një zëdhënës i Ministrisë së Jashtme në Gjermani.