Mjeshtri nga Vlora që nxjerr jetesën me anije artistike

Prej më shumë se 30 vitesh Axhem Binaj njihet si një nga mjeshtrit e modelimit dhe prodhimit të anijeve artistike.

Këtë zanat e nisi në vitin 1992 kur sapo ishte larguar nga detaria të cilën e njihte mirë. Ndërrimi i sistemit, e bashkoi me të papunët e tjerë, ish-kolegë të ndërmarrjes artistike.

“Më përpara kam punuar në det dhe pak a shumë e di se çfarë objektesh do një anije. Me ardhjen e demokracisë, çdo njeri po pozicionohej në punën e tij. Unë kisha një vëlla dhe kunatën që punonin në artistike dhe iu përkushtuam kësaj linje. Tregu ishte i varfër dhe traditën e Vlorës e përcollëm ne”, thotë ai.

Ka modeluar e prodhuar gjithfarë anijesh. Pëmend “Liburna”-n, “ Lembian”-n e mjaft të tjera anije të famshme nga koha e mesjetës me dy e tre direkë. Rreth tre muaj punë të pa ndërprerë i ka kërkuar modelimi dhe prodhimi i anijes me emrin “Americo Vesspuçi”, katër metra e gjatë, me e madhja dhe më voluminozja e prodhuar në këto gati dy dekada e cila ndodhet në Durrës.

“Kjo anije quhet “Americo Vesspuçi”, është prodhuar në Itali në 1930 dhe gjatë Luftës së dytë Botërore ka qenë anije spital. Është quajtur perla e ushtrisë italiane. Edhe sot e kësaj dite është në lundrim dhe shërben për oficerët e rinj të marinës italianë”, shprehet Binaj.

Me katalogët që ka në punishte, ai tregon për fotot e anijeve që ka ndërtuar duke filluar nga anija Çezar e deri te Liburna.

“Kjo është një anije angleze e bërë në 1864. Këtu janë bërë dy anije. Lundronin zakonisht në kolonitë angleze deri në Australi. Ishin rivale të njëra-tjetrës. Kjo do të paktën 10 ditë”, sipas tij.

Sa i përket të rinjve që duan të mësojnë këtë zanat Axhemi thotë se tashmë rinia vrapon drejt fitimit të menjëhershmëm, ndërsa kjo punë është fitimprurëse por do durim e përkushtim.

“Që të punojnë sapo vijnë dhe nuk i kushtojnë vëmendje. Mund të jenë me kokrra, po rendin pas fitimit të shpejtë”, tha Binaj.

LEXONI GJITHASHTU

• ‘Mbyllni portet për anijet ruse, kufizoni turistët’, Zelenski rendit kërkesat
• Ukraina shkatërron dy anije ruse