Kryeministri i Indisë, Narendra Modi, ka biseduar me presidentin amerikan, Joe Biden, lidhur me vizitën e tij në Ukrainë.
Ndërkohë Shtëpia e Bardhë tha se shpreson se ai mbështet qëndrimin e Kievit për t’i dhënë fund pushtimit të nisur nga Rusia.
Modi, i cili “zemëroi” ukrainasit pasi së fundi u takua në Moskë me presidentin rus, Vladimir Putin, vizitoi Kievin javën e kaluar dhe i tha presidentit Volodymyr Zelensky, se “asnjë problem nuk duhet të zgjidhet në fushëbetejë”.
Duke e informuar Bidenin për vizitën e tij, gjatë bisedës telefonike Modi “përsëriti qëndrimin e vazhdueshëm të Indisë në favor të dialogut dhe diplomacisë dhe shprehu mbështetjen e plotë për rikthimin e paqes dhe stabilitetit”, tha Ministria e Jashtme e Indisë përmes një njoftimi.
Zelensky ka kërkuar kthimin e të gjitha territoreve që Rusia ka pushtuar që kur ka nisur luftën në shkurt të vitit 2022.
India nuk ka mbështetur në mënyrë eksplicite qëndrimin e Zelenskyt.
Pavarësisht se ka raporte të ngushta me Uashingtonin, India ka refuzuar që t’i bashkohet sanksioneve amerikane kundër Moskës, me të cilën ka raporte historike.
LEXONI GJITHASHTU:
- Modi vizitë në Ukrainë, reagon Zelensky: Arritëm të nënshkruanim 4 dokumente
- Modi viziton Ukrainën, përpjekjet e kryeministrit indian për t’i dhënë fund luftës
