‘Mos negocioni me Putin, është bandit’, ish-oligarku rus paralajmëron Evropën

Ish-oligarku rus, Mikhail Khodorkovsky ka paralajmëruar Evropën që të mos negociojë me presidentin e Rusisë, Vladimir Putin për dhënien fund të luftës në Ukrainë.

Khodorkovsky, një biznesmen i cili tanimë jeton në Londër, por që dikur konsiderohej njeriu më i pasur i Rusisë, deklaroi në një intervistë për Euronews se Putin nuk është burrë shteti, por një bandit.

“Udhëheqësit e vendeve të mëdha evropiane ende besojnë se mund të negociojnë diçka me Putinin pa demonstruar forcën e tyre dhe se ata mund të bisedojnë me të. Ky është një gabim dramatik sepse ai nuk është një burrë shteti si ata, por veçse një bandit”, tha Khodorkovsky.

I pyetur se si do të përfundojë lufta, biznesmeni citoi parashikimin e bërë shefi i politikës së jashtme të BE-së, Josep Borrell.

Ai tha pak ditë më parë se lufta nuk mund të zgjidhet vetëm në tryezën e bisedimeve, por edhe në fushën e betejës.

“Unë u befasova nga zoti Borrell, ai është një burokrat evropian dhe nuk prisja ndonjë fjalë të ashpër prej tij, por ai tha disa fjalë shumë korrekte: kjo çështje nuk do të zgjidhet në tryezën e bisedimeve, por në fushën e betejës. Natyrisht, ne do të kemi negociata në fund të kësaj lufte, por para së gjithash ky konflikt do të zgjidhet në fushën e betejës”, u shpreh Khodorkovsky.

LEXONI GJITHASHTU

• Burg për ligjvënësin rus që kritikoi pushtimin e Ukrainës
• Fundi i luftës varet nga vëmendja e botës, thotë Zelenski
• Ukraina sulmon një pikë strategjike për luftën