Moska ndalon hyrjen e 30 qytetarëve japonezë, shkak saksionet e vendosura nga Tokio

Rusia ka ndaluar hyrjen në territorin e saj për 30 shtetas japonezë, mes tyre edhe zëdhënësi i Ministrisë së Jashtme të Japonisë, Toshihiro Kitamura, në përgjigje të sanksioneve që Tokio ka vendosur ndaj Moskës pas fillimit të luftës në Ukrainë.

Në një deklaratë zyrtare, Ministria e Jashtme ruse tha se vendimi është pjesë e “masave hakmarrëse ndaj veprimeve armiqësore të Japonisë”, të cilat lidhen me “të ashtuquajturin operacion special ushtarak” të Rusisë në Ukrainë.

“Si pjesë e masave për t’iu përgjigjur veprimeve sanksionuese zyrtare të Tokios kundër vendit tonë, është vendosur ndalim i pacaktuar hyrjeje në Rusi për 30 qytetarë japonezë”, thuhet në njoftimin e ministrisë.

Lista përfshin, përveç zëdhënësit Kitamura, gazetarë dhe profesorë nga disa universitete të njohura japoneze, të cilët, sipas Moskës, “kanë kontribuar në formimin e një narrative anti-ruse në opinionin publik japonez”.

Që prej fillimit të luftës në Ukrainë, Japonia ka miratuar disa raunde sanksionesh ndaj Rusisë, duke përfshirë ndalime eksportesh, ngrirje pasurish dhe kufizime për dhjetëra zyrtarë rusë.

LEXONI GJITHASHTU:

• Dëme, viktima dhe të plagosur/ Moska sulmon rrjetin elektrik të Ukrainës
• Japonia dyfishon shpenzimet e mbrojtjes, shkak kërcënimet nga Pekini e Moska