Moti i acartë bllokon Mbretërinë e Bashkuar

Qindra shkolla janë mbyllur dhe paralajmërimet për borë dhe akull mbeten në fuqi në të gjithë Skocinë, pjesë të Anglisë veriore, Uellsit dhe Anglisë jugperëndimore, si pasojë e motit të ashpër.

Kushtet ekstreme atmosferike kanë shkaktuar ndërprerje të mëdha në transport në të gjithë Mbretërinë e Bashkuar, duke çuar në anulimin e trenave dhe fluturimeve. Eurostar u ka këshilluar pasagjerëve që udhëtojnë midis Londrës dhe Holandës të shtyjnë udhëtimet e tyre, pasi shërbimet nuk kanë mundur të operojnë përtej Brukselit për shkak të motit të keq në Holandë.

Reshje të dendura bore janë regjistruar në disa zona të Skocisë. Liqeni Glascarnoch në Malësitë Skoceze ka shënuar 34 cm borë, ndërsa Dyce në Aberdeenshire dhe Altnaharra në Sutherland kanë regjistruar nga 27 cm, sipas Zyrës Meteorologjike.

Ndërkohë, Agjencia e Sigurisë Shëndetësore e Mbretërisë së Bashkuar ka lëshuar alarme të kuqe për të ftohtin në Angli, duke paralajmëruar se temperaturat e ulëta pritet të ndikojnë ndjeshëm në shëndetin dhe mirëqenien e qytetarëve. Këto alarme do të jenë në fuqi deri të premten.

Temperaturat më të ulëta gjatë natës kanë zbritur deri në minus 10.9°C në Shap, Cumbria, minus 10.3°C në Sennybridge, Powys dhe minus 9.9°C në Bala, Gwynedd, njoftoi Zyra Meteorologjike.