Moti i keq, ARRSH: Aksi Qukës-Qafë Plloçë i aksesueshëm pa probleme

Autoriteti Rrugor Shqiptar, ARRSH përmes një postimi në “Facebook” ka reaguar lidhur me bllokimin e aksit Qukës-Qafë Plloçë nga rrëshqitjet e një masivi gurësh. ARRSH thekson se grupet e punës ndodhen në terren.

Më tej bëhet me dije se është krijuar një bypass-i i përkohshëm për devijimin e trafikut në këtë segment si dhe për sigurinë e shoferëve. Sipas njoftimit aksi është i hapur ndërsa ARRSH bëri thirrje për zbatimin e rregullave të qarkullimit.

“Reshjet e dendura të shiut që kanë përfshirë vendin kanë shkaktuar çarjen e skarpatës dhe rënien e gurëve në trup të rrugës në km 35 të aksit Qukës-Qafë Plloçë.

Grupet e punës të ndodhura në terren, po bëjnë vlerësimin e situatës dhe kanë marrë të gjitha masat për krijimin e një bypass-i të përkohshëm me qëllim devijimin e trafikut në këtë segment, duke shmangur rrezikun ndaj përdoruesve të rrugës.

I gjithë aksi është i hapur, i aksesueshëm pa probleme dhe në monitorim të vazhdueshëm. Autoriteti Rrugor Shqiptar iu bën thirrje të gjithë drejtuesve të mjeteve: Ulni shpejtësinë, mbani distancën e sigurisë, shmangni frenimet e papritura dhe udhëtoni me kujdes”, njofton ARRSH.

LEXONI GJITHASHTU:

• Probleme nga moti i keq në Qukës-Qafë Plloçë, devijohet qarkullimi i automjeteve
• Lumi Vjosë rikthehet në shtratin e vet, situata normalizohet pas 4 ditësh përmbytje