Moti i keq godet vendin, IGJEUM paralajmëron përmbytje 

Moti i keq me reshje shiu, dëbore dhe erë të fortë përfshiu të gjithë vendin në 24 orët e fundit. Në disa qarqe ka pasur probleme me qarkullimin, ndërsa reshjet e shiut, që kanë rënë me shumë intensitet që prej mbrëmjes së djeshme, kanë rrëzuar masivë gurësh shkëmborë në rrugën Berat-Poliçan.

Zonat malore janë përfshirë nga dëbora, ndërsa problematike paraqitet situata në qarkun e Gjirokastrës. Sipas llogaritjeve të IGJEUM, përgjatë datave 7-11 janar priten reshje shumë intensive, pothuajse në të gjithë territorin.

Ndërkohë, reshjet e shiut të rëna së fundmi kanë përmirësuar situatën hidrike në vend duke rritur ndjeshëm nivelet e liqeneve në kaskadën e Drinit. Si pasojë nga 720 mega vat për orë energji elektrike që prodhohej një javë më parë, aktualisht prodhimi ditor nga tri HEC–et e kaskadës së lumit Drin është 17 100 mega vat për orë.

Në krahasim me një javë më parë, niveli i ujit është rritur mbi 3 metër vetëm në hidrocentralin e Fierzës. Sipas Korporatës Elektroenergjitike Shqiptare, përpos prurjeve, aktualisht nuk ka shkarkime nga portat, ndërsa situata po monitorohet me kujdes në varësi të përditësimit të parashikimit të reshjeve.