Moti ‘ndan’ Evropën, reshje dhe përmbytje në Veri, i nxehtë rekord në Jug

Rreth 4 mijë persona në Norvegji po evakuohen nga zonat e goditura nga stuhia “Hans”, që ka shkaktuar përmbytje dhe dëme. Në disa raste janë angazhuar helikopterë për të larguar banorët e zonave të largëta. Ndërkohë, jugu i Norvegjisë ndodhet në “alarm të kuq”, pas reshjeve të shumta që sollën përmbytje dhe shkatërrimin e një dige.

“Sapo mora mesazhin se do të evakuohemi menjëherë. I njëjti mesazh ka shkuar tek të gjitha familjet, që jetojnë pranë lumit. Jetojmë në një majë të vogël, ndaj druhemi se mund të ketë rrezik për rrëshqitje toke”, tha një grua.

Ndërkohë, në Kroaci, lumi Drava ka arritur maksimumin historik prej 704 centimetrash. Pak ditë më parë, për shkak të shirave të dendura rajone të ndryshme shpallën gjendjen e emergjencës, por tani situata është pak a shumë nën kontroll.

Nga ana tjetër, Spanja po vuan nga një valë e re e nxehti, e treta për këtë sezon veror. Në Valencia temperaturat kanë arritur në 46 gradë Celsius. Sipas autoriteteve, piku i vapës ishte të mërkurën, por sërish shumë rajone e mbajnë nivelin e alarmit në ngjyrë të verdhë dhe të kuq.

LEXONI GJITHASHTU:

• Çfarë po ndodh në Europë? Moti ekstrem, zjarret dhe stuhitë probleme në shumë vende
• Moti i keq shkakton aksidente, 16 të plagosur në pak orë