Motorët e ujit përplasen në bregdetin e Golemit, plagoset 31-vjeçari nga Kosova

Një incident është regjistruar këtë të diel në plazhin e Golemit, ku dy motorë uji janë përplasur me njëri-tjetrin. Aksidenti ka ndodhur rreth 800 metra larg perimetrit të sigurisë në det.

Sipas policisë, një nga mjetet drejtohej nga 25-vjeçari S.D., banues në Çorovodë, ndërsa tjetri nga 31-vjeçari P.B., shtetas nga Kosova.

Si pasojë e përplasjes është plagosur 31-vjeçari kosovar, i cili ka marrë dëmtime dhe është transportuar menjëherë drejt spitalit. Fatmirësisht, ai ndodhet jashtë rrezikut për jetën.

Ndërkohë, 25-vjeçari është shoqëruar nga policia për të dhënë deklaratën e tij në lidhje me rrethanat e aksidentit.

Njoftimi i plotë i policisë

“Rreth orës 17:36, në Golem, Kavajë, në vendin e quajtur “Manhatan”, rreth 800 metra larg perimetrit të sigurisë,(zonë detare për lundrim jo zonë plazhi), shtetasi S. D., 25 vjeç, lindur në Çorovodë, duke drejtuar një motor uji, është përplasur në det me një tjetër motor uji, që drejtohej nga shtetasi P. B., 31 vjeç, lindur në Kosovë.

Si pasojë e përplasjes, shtetasi P. B. ka pësuar dëmtime dhe është transportuar menjëherë në spital, nga shërbimet e Policisë Kufitare që po monitoronin hapësirën detare. Aktualisht, ai ndodhet jashtë rrezikut për jetën.

Shtetasi S. D. është shoqëruar në Komisariatin e Policisë për veprime të mëtejshme procedurale.

Nga verifikimet paraprake, rezulton se të dy drejtuesit e mjeteve lundruese po lundronin së bashku dhe ishin të pajisur me jelekë shpëtimi.

Grupi hetimor ndodhet në vendngjarje dhe po punon për sqarimin e plotë të rrethanave të përplasjes së dy Jet Ski-ve”. thuhet në njoftim.

LEXONI GJITHASHTU:

• Mjeku: Sporti nuk shkakton sëmundje kardiovaskulare, përkundrazi i parandalon ato
• Aksidenti në Tiranë–Durrës ku vdiq 18-vjeçari, arrestohet i riu që drejtonte mjetin