MPJ e Kosovës: Pretendimet e Lavrov, të pavërteta

Ministria e Punëve të Jashtme e Kosovës i ka quajtur të pavërteta dhe tendencioze pretendimet e ministrit të Jashtëm rus, Sergei Lavrov se “Kosova dhe disa vende tjera të Ballkanit Perëndimor po bëhen terren për krimin”.

Këtë reagim ministria e bëri deklaratave të ministrit të Jashtëm rus, Sergei Lavrov, dhe raportimeve nga agjencia ruse e lajmeve, TASS se “mercenarë nga Kosova” po dërgohen në rajonin Donbas të Ukrainës, ku forcat qeveritare ukrainase luftojnë me separatistët e mbështetur nga Moska.

Agjencia e lajmeve ruse TASS ka raportuar më 18 shkurt se ministri Lavrov kishte deklaruar se Rusia po verifikonte raportimet se “mercenarët nga Kosova, Shqipëria dhe Bosnje e Hercegovina po dërgohen në Donbas”.

Në reagimin e MPJ-së thuhet se me ligjet në fuqi, qytetarëve të Kosovës u ndalohet që të marrin pjesë në luftëra jashtë vendit.

“MPJ vlerëson se deklaratat e agjencisë së lajmeve TASS dhe ministrit Lavrov janë pjesë e një fushate të egër të propagandës ruse që kanë për qëllim tërheqjen e vëmendjes së gjithë botës demokratike nga ankthi që po krijon politika hegjemoniste dhe e diktatit rus mbi të drejtat e popujve për jetë të lirë e sovrane”, thuhet në reagim.

LEXONI GJITHASHTU: 

• Helikopterët ushtarakë rusë shumë pranë Ukrainës, imazhet satelitore