Mungesa e punëtorëve në bujqësi/ Fermeri nga Elbasani: Po punoj vetëm me familjen

Bujqësia po vuan mungesën e fuqisë punëtore. Punonjësit në këtë sektor pakësohen çdo ditë, duke bërë që pasojat ti vuajnë fermerët të cilët kanë investuar në sipërfaqe të mëdha me sera.

Gëzim Hysa është kthyer nga emigrimi dhe ka blerë sipërfaqë të mëdha tokash në fshatin Bujqës në Elbasan. Ai ka investuar në sera, dhe punën duhet ta bëjë vetë pasi nuk ka punëtorë.

“Kemi kohë që jemi kthyer nga emigrimi, e kemi nis me pak sipërfaqe tek rreth 1 dylym. Por mora iniciativën që ta shtoj sipërfaqen. Por kemi probleme të tjera që shfaqen  këtu në Shqipëri, sepse nuk e parashikum këtë gjë që do arrinte kështu. Për fuqi punëtorë flitet, nuk ka fare, bashkë me familjen punoj, edhe duke e shtuar jam e kam marrë guximin, por nuk ka punëtorë. Sot e kam lakër, lakra nuk do shumë punë, po kur të filloj domatja, speci kur është vjelja malli do njerëz. Sepse bëhet baltë dhe nuk arrin dot ta vjelësh”,-tha Gëzim Hysa.

Tregu me gjithë luhatjet e tij duket i mirë dhe mbështetja nga Ministria e Bujqësisë po ashtu. Por problem gjithashtu për fermerët që investojnë në sera përbën TVSH e plastmasit i cili ka kohën e tij të konsumit. 

“Kemi dhe probleme të tjera që ndikojnë tek aksizat e plastmasit, sepse është me TVSH me aksizë që gjithë bota nuk e ka vetëm te ne në Shqipëri, ndodhin këto gjëra. Që na kushtojnë, ja është bërë sera tjetër dhe vete shumë shtrenjtë, duhet të marrim diçka mbrapsht kompensim”,-u përgjigj fermeri.

Ndryshe nga qindra fshatra të Shqipërisë, Jagodina e Bujqësi i Elbasanit nuk është braktisur. Në këto zona, shumica e fermerëve kanë investuar në sera dhe prodhimi cilësor shkon i gjithi për eksport.

LEXONI GJITHASHTU:

• Fermerja 70-vjeçare: Lopëve u kam vënë muzikë që të bëjnë qumësht më të mirë
• Fermeri: 100-120 mijë lekë kushton gjeli i detit në Fier