Musk i vetëm, pse Ramaswamy nuk do të jetë pjesë e departamentit të rëndësishëm

Vivek Ramaswamy nuk do të jetë pjesë e Departamentit të Efikasitetit të Qeverisë, njoftoi Shtëpia e Bardhë të hënën.

Ky departament tani do të drejtohet vetëm nga sipërmarrësi Elon Musk.

Megjithatë biznesmeni amerikan, duket se nuk ka hequr dorë nga karriera politike brenda Partisë Republikane. Ai ka sinjalizuar planet për t’u kandiduar për guvernator të Ohajos.

“Vivek Ramaswamy luajti një rol të rëndësishëm në ndihmën për krijimin e Departamentit të Efikasitetit të Qeverisë,” tha zëdhënësja e Shtëpisë së Bardhë Anna Kelly në një deklaratë.

“Ai ka synuar të kandidojë për një post publik së shpejti, gjë që do ta detyrojë atë të largohet nga Departamenti i Efikasitetit të Qeverisë, bazuar në strukturën që kemi shpallur sot. E falënderojmë shumë për kontributin e tij gjatë dy muajve të fundit dhe presim që ai të luajë një rol kyç në realizimin e qëllimit tonë për ta bërë Amerikën sërish madhështore,” thuhet në deklaratën e Departamentit të Efikasitetit të Qeverisë.

Në lidhje me krijimin e Departamentit të Efikasitetit të Qeverisë, Trump ka premtuar një reformë të shpejtë të administratës së Uashingtonit, përfshirë një qasje agresive me krijimin e këtij departamenti, i cili është një grup pune joqeveritar që do të punojë për të gjetur mënyra për të zvogëluar numrin e punonjësve dhe programeve federale, si dhe për të ulur rregulloret federale.

Në njoftimin për krijimin e nismës DOGE, Trump u shpreh se kjo do t’i hapte rrugën administratës së tij për të eliminuar burokracitë qeveritare dhe rregulloret e tepërta, për të ulur shpenzimet e panevojshme dhe për të ristrukturuar agjencitë federale.

Elon Musk ka spekuluar publikisht se ekziston mundësia të identifikohen rreth 2 trilionë dollarë buxhetin federal që mund të shkurtohen. Kjo do të përbënte gati një të tretën e 6.1 trilionë dollarëve që qeveria federale shpenzoi në vitin fiskal 2023 dhe nuk mund të realizohet pa reduktime drastike në shërbimet dhe programet qeveritare.

LEXONI GJITHASHTU:

• Mes urdhrave ekzekutivë, Trump fal 1,500 persona të lidhur me sulmin e Kapitolit
• Cilët janë të gjithë urdhrat ekzekutivë që Trump nënshkroi ditën e parë?