Mes urdhrave ekzekutivë, Trump fal 1,500 persona të lidhur me sulmin e Kapitolit

Presidenti Donald Trump, në ditën e parë të rikthimit të tij në detyrë, nënshkroi një urdhër ekzekutiv për faljen e 1,500 personave të dënuar për akuzat që lidhen me sulmin e 6 janarit 2021 ndaj Kapitolit. Ky veprim përmbushi një premtim të rëndësishëm të bërë gjatë fushatës presidenciale të vitit 2024.

Gjatë një ceremonie në Zyrën Ovale, Presidenti Trump njoftoi gjithashtu uljen e dënimeve për 14 persona të përfshirë në akte të dhunshme gjatë sulmit. Mes të falurve janë figura kyçe të organizatave të ekstremit të djathtë, si “Proud Boys” dhe “Oath Keepers”, të cilët aktualisht po vuajnë dënime për rolin e tyre në ngjarjet e dhunshme.

Trump ka argumentuar se të akuzuarit u trajtuan padrejtësisht nga sistemi ligjor dhe ka theksuar nevojën për drejtësi ndaj tyre.

Sa i pwrket nddryshimeve të tjera madhore në politikë, në të njëjtën ditë, Presidenti Trump nënshkroi nëntë urdhra ekzekutivë, përfshirë: Tërheqjen nga Marrëveshja e Parisit për Klimën, e cila është kritikuar nga republikanët si një politikë që dëmton bizneset dhe ekonominë amerikane; Pezullimin e përkohshëm të punësimeve në qeverinë federale, përjashtuar ushtrinë; Anulimin e 78 urdhrave ekzekutivë të administratës Biden, përfshirë rregullore të lidhura me emigracionin dhe ndryshimet klimatike.

Trump dhe republikanët argumentojnë se rregulloret federale dhe politikat e administratës së mëparshme po dëmtonin zhvillimin ekonomik dhe po krijonin pengesa për bizneset amerikane.

Këto veprime shënojnë një kthesë të fortë në politikat e administratës Trump, duke e pozicionuar atë në qendër të debatit politik për klimën, drejtësinë dhe ekonominë amerikane.

LEXONI GJITHASHTU:

• VIDEO/ Elon Musk shkakton polemika, bën përshëndetjen naziste në inaugurimin e Trump
• Biden publikon selfien e fundit nga Shtëpia e Bardhë: Të duam Amerikë