‘Na duket sikur jemi në përgjim’, PS-PD debat për kamerat në mbledhjet e komisioneve

Vendimi i Byrosë së Kuvendit për të mos lejuar më tepër se 5 minuta kamerat e televizioneve në mbledhjet e Komisioneve shkaktoi debat mes deputetëve Luçiano Boçi e Petro Koçi.

Gjatë mbledhjes së Komisionit të Medias, Boçi e cilësoi vendimin e Byrosë të padrejtë dhe kërkoi rikthimin e kameramanëve në Komisione.

“Të lejohen si gazetarët ashtu dhe kameramanët. Është shumë e domosdoshme që gazetarët të jenë këtu”, tha deputeti demokrat Luçiano Boçi.

Ndërsa deputeti socialist, Petro Koçi e mbrojti vendimin e Byrosë për shkak të hapësirave të ngushta në sallën e Komisionit.

“Lidhur me prezencën e gazetareve, mendoj se situata është vendosur kështu për shkak të hapësirës, këtu nuk mund të vijnë 100 gazetarë”, u përgjigj deputeti socialist Petro Koçi.

Për Luciano Boçin, vendosja e mikrofonave ambientalë në komision i ngjason përgjimeve.

“Këtu thotë ‘kujdes’ dhe ne njoftohemi se ka mikrofona ambientalë dhe gjithçka që ne themi dëgjohet. Po na dukjet vetja sikur kemi përgjime ambientale. Kjo nuk është normale”, u shpreh Boçi.

Për Petro Koçin, mikrofonat do i bëjnë deputetët më të kujdesshëm në një tjetër aspekt.

“Besoj më shumë është si informacion nuk besoj se është për përgjime. Ideja është që njerëzit të jenë të kujdesshëm për fjalorin që përdorin dhe besoj se kjo ka lidhje me edukatën”, tha deputeti i PS.