NASA publikon pamjet satelitore të zjarreve në Delvinë

NASA ka publikuar në faqen e saj zyrtare pamje satelitore nga zjarret që kanë përfshirë jugun e Shqipërisë, përfshirë një vatër të madhe pranë Delvinës.

Sipas NASA-s, imazhet janë kapur më 24 korrik nga sateliti Terra, përmes instrumentit MODIS (Moderate Resolution Imaging Spectroradiometer).

Në to duken qartë zonat e përfshira nga zjarri dhe retë e dendura të tymit që përhapen në pjesë të ndryshme të vendit. Vatrat aktive shënohen me pika të kuqe, ndërsa tymi paraqitet me ngjyrë gri.

“Zjarri më i madh në momentin e imazhit ishte ai pranë Delvinës, në jug të Shqipërisë”- thuhet në publikimin e NASA-s.

Moti ekstrem dhe thatësira e tejzgjatur kanë përkeqësuar situatën në të gjithë rajonin e Ballkanit.

 Më 23 korrik, mediat raportuan për 5 vatra aktive zjarri në Maqedoni dhe 11 në Shqipëri, ndërsa temperaturat në disa vende, përfshirë edhe Serbinë, Bosnjën dhe Greqinë, shënuan vlera afër ose mbi 40°C.