Ndalohet qarkullimi i mjeteve në Urën e Digës Çengelaj

Bashkia Peqin ka vendosur ndalimin e qarkullimit për një kohë të pacaktuar të mjeteve motorike me tonazh mbi 3.5 ton në Urën e Digës Çengelaj, mbi lumin Shkumbin.

Vendimi vjen pas raportit teknik të Instituti i Ndërtimit, i cili ka evidentuar risk të lartë për strukturën aktuale të urës, duke rekomanduar ndërprerjen e menjëhershme të lëvizjes së mjeteve të rënda për të shmangur rrezikun e dëmtimit apo shembjes.

Autoritetet lokale kanë urdhëruar ndërkohë vendosjen e kufizuesve fizikë, konkretisht blloqe betoni në hyrje dhe dalje të urës, për të garantuar zbatimin e masës.

Ky vendim prek dhjetëra fshatra që lidhen me Peqinin dhe Belshin, duke sjellë kosto shtesë për banorët dhe bizneset e zonës, të cilët do të detyrohen të përdorin akse alternative për transportin e mallrave dhe shërbimeve.