Ndeshjet e së mërkurës/ Manchester City pret Dortmundin, Interi kërkon kryesimin

Emocionet e Champions vijojnë edhe këtë të mërkurë, ku të tjera emra të mëdhenj të futbollit në kontinentin e vjetër zbresin në fushë.

Ekipe si Barcelona, Dortmund, Inter apo Manchester City synojnë të marrin pikët e radhës, teksa objektivi është i njëjtë edhe për kampionët e botës, Chelsea.

Vëmendja më e madhe është në Etihad, aty ku skuadra e udhëhequr nga Pep Guardiola sfidohet nga Dortmund, edhe pse britanikët janë favoritë të padiskutueshëm në letër. Në 5 ballafaqimet e fundit mes tyre, gjermanët regjistrojnë 1 fitore, 1 barazim dhe 3 humbje.

Interi i Chivu ka si objektiv marrjen e 3 pikëve të radhës në mbrëmje ndaj Kairat Almaty dhe do ta rendiste në krye, krahas Bayernit dhe Arsenalit, si të vetmet ekipe me pikë të plota. Ndeshja luhet në Meazza, një detyrim dyfish që zikaltrit të bëjnë gjërat si duhet.

Barcelona ka udhëtuar drejt Brugge, aty ku skuadra vendëse e pret në mbrëmje, një ekip që gjithmonë transformohet në Champions. Në kërkim të pikëve janë edhe Galatasaray dhe Leverkusen, teksa spektakël pritet dhe në Marsejë–Atalanta e Newcastle–Athletic Bilbao.

Dy duelet e pasdites janë Pafos–Villarreal dhe Qarabag–Chelsea.

LEXONI GJITHASHTU:

• Champions League/ Liverpool mposht Realin e Madridit, Bayern triumfon ndaj PSG
• “Mace e zezë” për Liverpoolin, Crystal Palace fiton sërish dhe e eliminon nga Kupa