Ndryshim ligjit të adresave, PS propozon heqjen e gjobës në rast mosdeklarimi të banimit

Partia Socialiste kërkon heqjen e gjobës në rast të mos-deklarimit të ndryshimit të vendbanimit. Dy deputetët e grupit parlamentar socialist, Blerina Gjylameti dhe Elio Hysko kanë propozuar një ndryshim në ligjin për gjendjen civile, më konkretisht, heqjen e gjobës prej 10 mijë lekësh në rast të mosdeklarimit të ndryshimit të vendbanimit.

Në relacion dy deputetët theksojnë se ky ndryshim nevojitet pasi nuk ka prodhuar efektin e pritshëm dhe shumë njerëz nuk kanë deklaruar ndryshimin e vendbanimit për shkak se kanë tejkaluar afatin 30 ditor dhe nëse e bëjnë një veprim të tillë, atëherë do të përballen me gjobën.

Por ndryshimi i këtij ligjit ngre një pikëpyetje të madhe që lidhet me trajtimin e diferencuar të qytetarëve pasi një pjesë është përballur me sanksionet administrative, ndërsa një pjesë tjetër jo.

Ky ligj u propozua në kohën kur ministër i Brendshëm ishte Saimir Tahiri nën argumentin se qytetarët duhet të saktësonin vendbanimin e tyre dhe shkaktoi shumë radhë nëpër zyrat e gjendjes civile ku qytetarë të shumtë për të shmangur sanksionin administrativ kërkuan ndryshimin e vendbanimit.