Në ankand koleksioni i legjendës së “Queen”, mund të arrijë në 6 mln paund

Shtëpia e ankandit “Sotheby” ka vënë në dispozicion të publikut në Londër mbi 1 mijë e 500 sende, kryesisht veshje, që i përkisnin yllit të muzikës Freddie Mercury.

Objektet do të dalin në shitje në një event të shumëpritur, që do të mbahet nga data 6 deri më 8 shtator.

Gjithçka bëhet me dëshirën e Mary Austin, ish-partnerja e vokalistit legjendar të The Queen, që deri më sot është kujdesur për trashëgiminë e tij.

Koleksioni, që sipas vlerësimeve paraprake pritet të arrijë vlerën e 6 milionë stërlinave, përfshin kostume skene, këpucë me shkëlqim, apo kurorën e klonuar të Shën Eduardit me peliçen sintetike prej kadife të kuqe, të veshur gjatë turit të fundit botëror të Queen në vitet ‘80.

Gjithashtu, në shitje do të dalë edhe teksti i shkruar me dorë nga vetë këngëtari i këngës që konsiderohet si himni i bandës britanike, “We are the Champions”, që mund të kapë vlerën e 200 mijë stërlinave.

I lindur në Zanzibar nga prindër me origjinë persiane, Freddie Mercury vdiq nga sëmundja e SIDA-s në vitin 1991.

LEXONI GJITHASHTU: 

• Konflikti në ndeshjen Tirana-Beshiktash, precedohen penalisht 14 tifozët e skuadrave
• EMRI| Shpërndante kanabis për pushesit në Sarandë, arrestohet i riu nga Tirana