Në garë vetëm një kandidat, Kryemadhi për zgjedhjet brenda LSI-së: Pati mbi 80% pjesëmarrje, në votimet e 30 qershorit as 10%

Kryetarja e Lëvizjes Socialiste për Integrim, Monika Kryemadhi deklaroi se zgjedhjet për kryetar partie në LSI kanë një ndryshim të madh me ato të 30 qershorit.

Teksa u pyet nga gazetari i Euronews Albania, Renaldo Salianji se cili është ndryshimi, pasi në të dyja kishte nga një kandidat në garë, Kryemadhi theksoi se në zgjedhjet e 30 qershorit nuk u pranuan komisionerët e PD-së dhe LSI-së.

Më tej ajo nëvizoi se në zgjedhjet për kryetar të LSI-së pati mbi 80% pjesëmarrje, ndërsa në ato të 30 qershorit vetëm 10%.

“Ka një ndryshim shumë të madh. Ndryshimi i madh është se zgjedhjet e LSI-së më 21 nëntor u shpallën 4 muaj para që në gusht, për të pasur kandidat dhe për të garuar. E dyta, komisionerët nuk i ndërtoi Monika Kryemadhi, u ndërtuan në strukturat e partisë. Në zgjedhjet e 30 qershorit komisionerët e PD-së dhe LSI, Edi Rama nuk i pranoi, që të shikonim sesa do të ishte pjesëmarrja e vërtetë.  

Ajo që është thelbësore entuziazmi im, nuk është entuziazëm pse u rizgjodha kryetare e LSI-së, sepse të jesh kryetare e LSI-së do të thotë të jesh gjithmonë e vëmendshme, në kuptimin që të bësh gjithmonë një gjë të re, sepse energjia e të rinjve nuk të le të vegjetosh, duhet të jesh gjithmonë me hallin e tyre.

Në zgjedhjet 21 nëntorit ne patëm 80 e ca përqind dhe pati dhe votim online dhe rezultati doli menjëherë. Ndërsa në votimet e 30 qershorit, pati një pjesëmarrje as 10% dhe pas një muaji, edhe pse filluan t’i ndryshonin dhe ti mbushnin kutitë, nuk i kalkulonin dot matematikisht”, tha Kryemadhi

“Në një pushtet vendor kur t’i heq të drejtën e votimit më shumë së gjysmës së qytetarëve, ato nuk janë zgjedhje. Kur të jetë në pushtet LSI do të ketë nga 3 apo 4 kandidatë, mos u bëj merak”, tha ajo më tej.