Në ”Ilva Now” diskutohet gara zgjedhore për Tiranën

Shqiptarët shohin si cilësitë më të rëndësishme te kandidatët për deputetë pastërtinë e figurës dhe integritetin, ndërkohë që cilësi si efiçenca, mënyra se si punohet apo përvoja në biznes e politikë konsiderohen si më pak të rëndësishme.

Lexo më shumë: Tre cilësitë që shqiptarët shohin si më të rëndësishmet te një deputet

Ky vlerësim i elektoratit për deputetët u prezantua sot në emisionin “Ilva Now” dhe ishte rezultat i sondazhit të tretë kombëtar të Euronews Albania me kompaninë prestigjioze MRB.

Lexo më shumë: Tre cilësitë që shqiptarët shohin si më pak të rëndësishmet te një deputet

Gazetari Mentor Kikia kritikoi faktin se në Shqipëri mungojnë liderët e vërtetë. Sipas tij gjatë gjithë kohës Shqipëria ka pasur “kryetarët e gjithëpushtetshëm si në pozitë ashtu edhe në opozitë” gjë që sipas tij u ka shpërfytyruar qytetarëve idenë e liderëve.

Analisti Plator Nesturi e përqendroi vëmendjen te fakti se lidhjen me elektoratin realisht e mbajnë më shumë ata politikanë që akuzohen për korrupsion, ndërsa ata që janë politikanë karriere shkëputen. Këtë Nesturi e konsideroi si thelbin e problematikës.

Në studio tre kandidatët për deputetë të Tiranës, Dashamir Shehi (Lëvizja për Zhvillim Kombëtar), Klajda Gjosha (Lëvizja Socialiste për Integrim) dhe Pano Soko (Nisma Thurje) i konsideruan rezultatet e sondazhit rrjedhojë e politik-bërjes së viteve të fundit. Por për gazetarin Mentor Kikia vlerësimet për cilësitë vijnë nga mendësia e përgjithshme e qytetarëve, të cilët mbeten të keq-edukuar.