Në kërkim prej vitesh, arrestohet në Borsh Moisi Habilaj. Detaje nga operacioni

Pas disa vitesh në kërkim është vënë në pranga Moisi Habilaj. Sipas burimeve policore, Moisi Habilaj është arrestuar mbrëmjen e sotme në Borsh gjatë një operacioni të zhvilluar nga strukturat e Policisë së Shtetit.

Ai është lokalizuar në një beach bar në pronësi të familjarëve të tij, ku qëndronte prej kohësh. Sipas të njëjtave burime, arrestimi është kryer nga forcat e Operacionales së Tiranës, të cilat pas informacioneve të siguruara dhe përdorimit të metodave speciale të hetimit kanë bërë të mundur identifikimin e vendndodhjes së tij dhe rrethimin e zonës.

Burime pranë hetimit bëjnë me dije se në momentin e arrestimit, Habilaj ishte i maskuar me kapele dhe mjekër, në përpjekje për të shmangur identifikimin nga autoritetet.

Policia pritet të japë detaje zyrtare mbi operacionin dhe rrethanat e arrestimit në orët në vijim. Moisi Habilaj kërkohej nga drejtësia italiane prej disa vitesh. Ai i kishte shpëtuar dënimit me burg për trafik ndërkombëtar droge.

Menjëherë pasi Gjykata e Apelit në Katania konfirmoi dënimin me 15 vite burg, oficerët e policisë shkuan në banesën ku Moisi Habilaj ishte në arrest shtëpie, por nuk e gjetën aty.

Ne janar të këtij viti Gjykata e Posaçme e Shkallës së Parë ka dënuar sërisht me 15 vite burg për Moisi Habilajn, i shpallur fajtor për trafik narkotikësh dhe pjesëmarrje në grup të strukturuar kriminal.

Në aplikim të gjykimit të shkurtuar, dënimi i tij u ul me një të tretën, duke përfunduar në 10 vite heqje lirie.