Edvin Prençi, kreu i shoqatës Pro Export Albania tha në “Now me Erla Mëhillin”, se rënia e euros e ka çuar Shqipërinë në reduktim të linjave prodhuese.

Ai tha se këto biznese kanë kaluar në kufijtë e mbijetesës ndërsa shtoi se shumë biznese kanë mungesë të theksuar likuiditeti për të bërë edhe pagesat e detyrushme.

Sipas tij janë në reduktim disa biznese, të paktën mbyllen dy biznese në javë dhe rreth 30 punonjës në ditë po largohen nga vendet e punës.

“E para kjo destabilizon çdo biznesplan. Kjo i ka kaluar edhe kufijtë e mbijetesës. Gjëja e parë që po ndodh është mbyllja e linjave prodhuese gjë që çon në reduktimin e punonjësve në ambientet e punës. Ka që janë mbyllur, janë e ca që do të mbyllen.

Por ajo që po vihet re tani është fakti që shumë biznese kanë mungesë të theksuar likuiditeti për të bërë edhe pagesat e detyrueshme. Aktualisht janë në reduktim disa biznese, të paktën mbyllen dy biznese në javë dhe rreth 30 punonjës në ditë po largohen.

Rënia e euros ka çuar në rritjen e çmimit final ndaj klientit, ndaj po humbasim klientët. Shumë brande të huaja po largohen nga vendi jonë, ndaj kjo çon në reduktim të linjave prodhuese. Kjo ka filluar në radhë të parë në sektorin e këpucëve, ka kaluar në sektorin e veshjeve intime, e po vazhdon në sektorë të tjerë”,-tha Edvin Prençi.