Në pritje të City-Borussia, të gjithë me sytë nga Haaland

Të gjithë sytë do të jenë kthyer nga Erling Braut Haaland të mërkurën mbrëma, kur sulmuesi i Manchester City të rreshtohet kundër ish-klubit të tij Borussia Dortmund në stadiumin “Etihad”, në kuadër të ndeshjeve të Grupit G të Champions League.

Në dy sezone e gjysmë të kaluara me ekipin gjerman, Haaland shënoi plot 62 gola në Bundesligë, nga 67 ndeshje të luajtura.

“Për të qenë një djalë kaq i ri, ai është shumë i pjekur. Mendoj se ka një të ardhme të artë dhe do të japë shumë për ekipin jo vetëm këtë sezon, por edhe në vitet e ardhshme. Mendoj se klubi ynë nënshkroi me një lojtar dhe një njeri të jashtëzakonshëm,” – u shpreh Ilkay Gundogan, lojtar i Manchester City.

Manchester City dhe Borussia Dortmund do të përpiqen të vijojnë nisjen e mirë të sezonit 2022-2023 të Champions League.

Ekipi i Pep Guardiola mposhti 4-0 Sevilla-n në takimin e parë, ndërsa gjermanët fituan 3-0 në shtëpi ndaj Kopenhagen.

Dy ekipet e mundura, Sevilla dhe Kopenhagen, do të përballen po të mërkurën në kuadër të ndeshjeve të grupit G.

Nga grupi E, Milan do të presë në shtëpi Dinamon e Zagrebit, ndërsa Chelsea austriakët e Salzburgut.

Grupi F do të ketë përballë Shakhtar Donjeck me Celtic dhe Real Madrid me Lajpcig.

Sfida më interesante do të jenë ato të Grupit H, me Juventus që do të presë Benfikën dhe Paris San Zhermen që do të luajë në transfertë kundër Makabi Haifa.

LEXONI GJITHASHTU:

• Manchester United: Cristiano Ronaldo dëshiron të largohet nga klubi këtë verë