Në zemër të Gjirokastrës, shtëpia “Kadare” si skenë e artit dhe kulturës

Gjatë sezonit të pranverës, shtëpia-muze e lindjes së shkrimtarit Ismail Kadare në qytetin e Gjirokastrës ka pasur një gjallëri të veçantë.

Krahas mikpritjes së turistëve, kjo banesë është kthyer në një qendër për organizimin e aktiviteteve kulturore me përmasa kombëtare dhe ndërkombëtare.

Mjediset e shtëpisë karakteristike, që prezantojnë jetën dhe krijimtarinë e gjeniut të letërsisë shqipe, shërbejnë si skena kulturore për artistët dhe veçanërisht për të rinjtë.

Aktivitetet letrare, kulturore dhe koncertet e ndryshme që organizohen në shtëpinë-muze të Ismail Kadaresë tërheqin kërshërinë dhe interesimin e specialistëve të muzikës dhe vizitorëve.

“Ky konkurs me emrin ‘Gjiroclassica’ i jep një rëndësi të veçantë instrumentistëve të rinj, por edhe qytetit i jep një gjallëri të re. Promovohen vlerat e artistëve të rinj, të cilët në të ardhmen do të jenë protagonistët e skenës që do të mbajnë gjallë aktivitetet kulturore dhe artistike në vendin tonë,” thotë instrumentisti Anastas Lako.

“Mua qyteti më ka lënë shumë përshtypje, është shumë i bukur dhe ka histori. Kjo është hera ime e dytë që vij këtu në Gjirokastër, kam pak emocione, por kam shumë dëshirë të marr pjesë në këtë konkurs dhe dëshiroj të fitoj,” thonë dy nga djemt pjesëmarrës në konkurs.

Shtëpia e gurtë ku Kadareja kaloi një pjesë të fëmijërisë dhe rinisë së hershme është një prej pikave të preferuara të vizitorëve dhe guidave turistike në Gjirokastër.

LEXONI GJITHASHTU:

• Gjirokastër/ Starton festivali ndërkombëtar i muzikës klasike “Gjiroclassica”
• Suveniret tradicionale tërheqin turistët e huaj gjatë vizitës në Gjirokastër