Nën vapën “përvëluese”, mbi 1 milion myslimanë nisin Haxhin në Mekë

Më shumë se një milion besimtarë myslimanë nga e gjithë bota kanë nisur pelegrinazhin e shenjtë të Haxhit në qytetin e Mekës, në Arabinë Saudite.

Këtë vit, Haxhi përkon me fillimin e verës, dhe temperaturat pritet të kapërcejnë 40 gradë Celsius.

Pas valës së nxehtësisë së vitit të kaluar, që shkaktoi mbi 1,300 vdekje, autoritetet saudite kanë shtuar masat për mbrojtjen e pelegrinëve, përfshirë sisteme të avancuara ftohjeje dhe udhëzime të veçanta për të shmangur ekspozimin në diell.

Pelegrinët do të marrin pjesë në rituale fetare që datojnë mbi 1,400 vjet më parë, duke përfshirë rrethimin shtatë herë të Qabes – vendit më të shenjtë të Islamit – si dhe vizitat në vende të tjera të shenjta në afërsi të Mekës.

Rituali pesëditor kulmon me rrethimin e dytë të Qabes, një lamtumirë shpirtërore përpara se pelegrinët të largohen nga qyteti i shenjtë.

Për të garantuar sigurinë e tyre, çdo pelegrin është pajisur me një çantë zyrtare sigurie që përmban këshilla mbi kujdesin ndaj nxehtësisë dhe dehidratimit, çfarë të veshin dhe çfarë të shmangin gjatë qëndrimit në diell.

Autoritetet kanë ndaluar pjesëmarrjen e fëmijëve nën 12 vjeç në Haxhin e këtij viti, një ndryshim i rëndësishëm në rregullat e pelegrinazhit.

Sipas ligjit islam, fëmijët nuk janë të detyruar të kryejnë Haxhin apo të përmbushin detyrime të tjera fetare deri në moshën e pubertetit.

Kujtojmë se çdo vit pelegrinët myslimanë nisin udhëtimin shpirtëror të Haxhit i cili është një nga pesë shtyllat e Islamit dhe është detyrim për çdo mysliman që ka mundësi fizike dhe ekonomike që ta kryejë atë të paktën një herë në jetë.

LEXONI GJITHASHTU:

• Agjëruesi i veçantë i Ramazanit, Omeri me nevoja specifike ndjek traditën e familjes
• Raporti i BE: 90% e rasteve të diskriminimit në Belgjikë përfshijnë myslimanë