Netanyahu: Autoriteti Palestinez s’mund të qeverisë Gazan pa reformë radikale

Gjatë konferencës së përbashkët për shtyp me Presidentin amerikan Donald Trump, Kryeministri izraelit Benjamin Netanyahu e cilësoi takimin si një hap jo vetëm drejt përfundimit të luftës në Gaza, por edhe për vendosjen e një rruge të qëndrueshme paqeje në të gjithë Lindjen e Mesme.

Ai shprehu mbështetjen e tij të plotë për planin 20-pikësh të propozuar nga SHBA-të, duke e konsideruar atë një garanci që Izraeli të mos jetë më kurrë nën kërcënimin e Hamasit.

Netanyahu paralajmëroi se në rast se Hamasi refuzon planin ose e pranon formalisht, por nuk e zbaton në praktikë, atëherë Izraeli do të ndërmarrë veprime të njëanshme për të çuar luftën në fund.

“Kjo mund të bëhet në mënyrën e lehtë, ose mund të bëhet në mënyrën e vështirë, por do të bëhet,” tha Netanyahu gjatë një konference të përbashkët për shtyp në Shtëpinë e Bardhë me Presidentin amerikan Donald Trump. “Ne preferojmë mënyrën e lehtë, por duhet bërë.”

Netanyahu theksoi se objektivat e luftës së Izraelit duhet të përmbushen. “Ne nuk e luftuam këtë luftë të tmerrshme, nuk sakrifikuam të rinjtë tanë më të mirë që Hamasi të mbetet në Gaza dhe të na kërcënojë përsëri,” shtoi ai.

Në rast të pranimit të planit nga Hamasi, Netanyahu tha se Izraeli do të nisë me një “tërheqje modeste” nga Gaza, e ndjekur nga lirimi i pengjeve izraelite brenda 72 orëve. Më pas, do të krijohet një organ ndërkombëtar që do të çarmatosë Hamasin dhe do të demilitarizojë Gazën.

Gjatë konferencës, Netanyahu hodhi poshtë mundësinë që Autoriteti Palestinez (AP) të ketë rol në qeverisjen e ardhshme të Gazës pa një transformim “radikal”.

“E vlerësoj qëndrimin tuaj të vendosur se Palestina nuk mund të ketë asnjë rol në Gaza pa kaluar nëpër një transformim radikal dhe të vërtetë,” i tha Netanyahu Presidentit Trump.

“Shumica dërrmuese e izraelitëve nuk besojnë se leopardi i Palestinës do të ndryshojë njollat e tij,” shtoi ai, duke përforcuar skepticizmin ndaj përfshirjes së AP-së.

Përpara deklaratës së Netanyahut, Presidenti Trump kishte shprehur mbështetje të plotë për Izraelin, në rast të refuzimit të planit nga Hamasi. “Bibi, do të kishe mbështetjen tonë të plotë për të bërë atë që do të duhej të bëje,” tha Trump.

Sipas planit të paqes të propozuar nga SHBA-të, parashikohet krijimi i një organi kalimtar për qeverisjen e Gazës, ndërsa Autoriteti Palestinez përfundon një “program reformash”.

Plani nuk përjashton plotësisht përfshirjen e AP-së në të ardhmen, duke saktësuar se “kur programi i reformës të zbatohet me besnikëri, mund të krijohen kushtet për një rrugë të besueshme drejt vetëvendosjes dhe shtetësisë palestineze”.

Megjithatë, dokumenti prej 20 pikësh përjashton qartësisht çdo rol për Hamasin në të ardhmen politike të Gazës.

LEXONI GJITHASHTU:

• Trump i kërkon Hamasit të pranojë planin e propozuar të paqes në Gaza
• Trump pas takimit me Netanyahun: Jemi shumë afër paqes në Lindjen e Mesme