Netanyahu: Nuk do të largohem nga politika, edhe nëse më falin

Kryeministri izraelit Benjamin Netanyahu ka deklaruar se nuk do të tërhiqet nga politika, edhe nëse i jepet një falje presidenciale në gjyqin e tij për korrupsion, raportoi Reuters.

Duke iu përgjigjur pyetjes së një gazetari nëse planifikonte të tërhiqej nga jeta politike nëse do të merrte një falje, Netanyahu u përgjigj: “Jo”.

Muajin e kaluar, Netanyahu i kishte kërkuar Presidentit Isaac Herzog t’i jepte një falje. Avokatët e tij argumentuan se seancat e shpeshta gjyqësore po ndikonin në aftësinë e tij për të qeverisur dhe se një falje do të ishte në dobi të vendit. Në Izrael, faljet zakonisht jepen vetëm pasi një çështje ka përfunduar dhe është marrë një dënim.

Netanyahu ka mohuar të gjitha akuzat për ryshfet, mashtrim dhe shkelje të besimit. Ekipi i tij ligjor thekson se kryeministri beson se një shpallje e pafajësisë mund të arrihet nëse gjyqi vazhdon deri në përfundim.

Para se Netanyahu të bënte zyrtarisht kërkesën, presidenti amerikan Donald Trump i shkroi Presidentit Herzog, duke e inkurajuar të merrte parasysh dhënien e një faljeje për liderin izraelit.

Politikanët e opozitës në Izrael janë të ndarë mbi këtë çështje. Disa besojnë se çdo falje duhet të kërkojë largimin e Netanyahut nga jeta politike dhe pranimin e fajësisë. Të tjerë thonë se ai duhet së pari të shpallë zgjedhje kombëtare, të cilat janë të planifikuara për tetor 2026.

LEXONI GJITHASHTU:

• Biseda Zelensky-Meloni: Italia premton ndihma për infrastrukturën energjetike
• Provokim i rrezikshëm, Japonia akuzon Kinën për manovër që mund të niste sulm