Netanyahu paralajmëron Hamasin: Po ju vjen fundi! OBSH thirrje për armëpushim

“Mori fund”. Me këto fjalë kryeministri i Izraelit Benjamin Netanyahu u bëri thirrje luftëtarëve të Hamasit që të dorëzoheshin. “Lufta do të kërkojë kohë, por ky është fillimi i fundit për Hamasin”, tha Netanyahu.

Në të njëjtën kohë, duke cituar burime konfidenciale, mediat izraelite kanë raportuar se lufta do të vijojë për të paktën 2 muaj.

Nga ana e saj, lëvizja e Hamasit refuzon dorëzimin pa kushte. Ajo ka deklaruar se asnjë peng nuk do të largohet i gjallë pa u plotësuar kushtet e grupit.

Ndërkohë, Organizata Botërore e Shëndetësisë miratoi një draft rezolutë përmes të cilës kërkon akses të menjëhershëm humanitar në Gaza.

“Ritheksoj se, në kontekstin aktual, asistenca e qëndrueshme humanitare nuk është e mundur. Pa një armëpushim nuk ka paqe dhe pa paqe s’mund të ketë mjekim”, tha Tedros Adhanom Ghbreyesus, drejtor i përgjithshëm i OBSH-së.

Ndërkohë, Programi Botëror për Ushqimin deklaroi më herët se popullsia në Gaza po vdes nga uria, me mbi 80% të familjeve që nuk kanë akses tek ushqimet.

Ndërsa bilanci i viktimave, sipas autoriteteve të Hamasit, është ngjitur mbi 18 mijë të vrarë dhe 49 mijë e 200 të plagosur.

LEXONI GJITHASHTU:

• Izraeli bombardon jugun e Gazës, pas kërcënimeve të Hamasit për pengjet
• Trupat izraelite arrestojnë luftëtarët e Hamasit, videot ku shfaqen të zhveshur