Ushtria izraelite është zotuar se do të vazhdojë operacionin e saj në Gaza, edhe pse ka pranuar se ai është “i zgjatur dhe i vështirë”.

Një zëdhënës deklaroi gjatë fundjavës se shteti hebre po zgjeron operacionet tokësore në jug dhe veri të Rripit të Gazës.

Ndërkohë, presidenti amerikan Joe Biden zhvilloi një bisedë telefonike me kryeministrin izraelit, ku e vuri theksin tek “nevoja kritike” për të mbrojtur civilët.

Si përgjigje, Netanyahu tha se lufta do të vazhdojë derisa synimet e Izraelit të arrihen.

Presidenti Biden u tha gjithashtu reporterëve se nuk i kishte kërkuar kreut të qeverisë izraelite një armëpushim.

Të premten, Këshilli i Sigurimit të OKB-së aprovoi një rezolutë që kërkonte lejimin në shkallë të gjerë të shpërndarjes së ndihmave në Gaza, por nuk arriti të bënte thirrje për një armëpushim mes dy palëve të përfshira në luftë.

Edhe bisedimet e mbajtura më herët gjatë javës në Egjipt, me qëllim arritjen e një armëpushimi të ri dështuan të jepnin rezultate.

Ministria e Shëndetësisë e menaxhuar nga Hamas deklaroi se mbi 20 mijë persona kanë vdekur dhe 54 mijë të tjerë janë plagosur në Gaza që nga nisja e luftës, me shumicën e viktimave që janë gra dhe fëmijë.

Nga ana e tij Izraeli thotë ka marrë masa për shmangien e viktimave në radhët e civilëve, por ka fajësuar Hamasin se kamuflohet në zonat e banuara.

LEXONI GJITHASHTU:

• Netanyahu: Do të luftojmë deri në fitore, pavarësisht trysnisë ndërkombëtare
• Netanyahu urdhër Mosadit: Vrisni liderët e Hamasit