Nga aktore në aktiviste, Jennifer Lawrence bëhet zëri i grave afgane

Aktorja fituese e çmimit Oscar, Jennifer Lawrence, ka zgjedhur të kalojë në rolin e producentes.

Së fundmi ajo ka realizuar dokumentarin “Bukë dhe Trëndafila”, që eksploron jetën e grave në Afganistanin e kontrolluar nga talebanët.

Në një intervistë për BBC, aktorja 32-vjeçare ka deklaruar se për këtë nismë të re të saj ishte frymëzuar nga sfida që një vajzë afgane i kishte bërë një lideri taleban, lidhur me mbylljen e shkollave dhe universiteteve për gratë në Afganistan.

“Zemra ime rrahu shumë shpejt kur pash videon me këtë grua që sfidonte talebanët. Këto janë gjëra që nuk i sheh çdo ditë në lajme, ndaj ajo përbën një pjesë të rëndësishme të filmit tonë, ku pasqyrohet historia e këtyre grave”, ka thënë Lawrence.

Në rrëfimin e saj për rrjetin informativ britanik, ajo është shprehur se të shohësh mënyrën se si gratë afgane kanë humbur kontrollin e jetës së tyre është diçka shkatërruese.

“Ato nuk kanë autonomi në vendin e tyre. Ndaj është e rëndësishme t’u jepet mundësia të tregojnë dhe dokumentojnë historitë e tyre”, ka shtuar Lawrence.

Filmi dokumentar është prodhuar nga kompania e produksionit që aktorja ngriti në vitin 2018 së bashku me një shoqen e saj.

LEXONI GJITHASHTU:

• Aktorja e “Star Wars”, nderohet pas vdekjes me një yll në Holliwood
• U bë nënë 68 vjeçe, aktorja zbulon se foshnja është e djalit të saj të vdekur