Nga Ançeloti te Alonso, Perez mendon se Reali nuk ka ndryshuar

Edhe pse Reali mban vendin e parë në kampionat dhe është i sigurt për në fazën tjetër të Champions League, kjo nuk e kënaq presidentin Fiorentino Perez.

Ai ka analizuar formën e ekipit dhe ka pohuar se skuadra nuk ka asnjë ndryshim krahasuar me periudhën e Ançelottit, duke ngritur pikëpyetje mbi të ardhmen e trajnerit Xabi Alonso.

Perez ka vërejtur se nuk ka ndryshime të mëdha taktike pasi sipas tij skuadra nuk ushtron presionin e duhur dhe mbështetet kryesisht te disa yje të caktuar.

Një incident i veçantë ka ndodhur mes trajnerit Alonso dhe sulmuesit Vinicius Jr gjatë El Clasicos, ku braziliani u zëvendësua dhe reagoi keq.

Sjellja e tij nuk u ndëshkua nga drejtuesit, gjë që nuk i pëlqeu trajnerit spanjoll.

Si pasojë, është marrë një vendim ku thuhet se Vinicius Jr mund të shitet për çdo ofertë mbi 150 milionë euro.

Interesi për sulmuesin ka qenë i madh, sidomos nga Arabia Saudite, ku ekipe si Al Hilal dhe Al Ittihad e kanë kërkuar më parë.

Deri tani, Reali e konsideronte të pashitshëm, por me ardhjen e Alonsos, situata ka ndryshuar dhe Vinicius Jr mund të jetë largimi i radhës.