Nigel Farage propozon deportimin e 600 mijë emigrantëve pa dokumente nga Britania

Një vit më parë, Nigel Farage, politikani populist i së djathtës që ka tronditur skenën politike britanike deklaroi se deportimi i qindra mijëra emigrantëve të paligjshëm nga Britania ishte një “pamundësi politike” dhe nuk ia vlente të diskutohej.

Të martën, Farage prezantoi një plan për të bërë pikërisht këtë: të deportojë deri në 600 mijë emigrantë pa dokumente, nëse partia e tij anti-emigracion dhe jashtë sistemit politik tradicional, Reform U.K., do të fitonte zgjedhjet e përgjithshme që pritet të mbahen në vitin 2029.

Ky kthim qëndrimi nga Farage ishte i habitshëm, ndonëse jo krejt i papritur, duke pasur parasysh karrierën e tij të lëvizshme dhe instinktet e tij politike të shpejta. Megjithatë, ky qëndrim pasqyron edhe ashpërsimin në rritje të debatit mbi emigracionin në Britani, jo vetëm nga partitë margjinale, por edhe nga forcat kryesore politike – përfshirë Partinë Laburiste në pushtet.

“Diskursi elitar po ndryshon,” – thotë Sunder Katwala, drejtor i organizatës kërkimore British Future në Londër. Ai thekson se ky ndryshim lidhet me polarizimin e politikës, ndikimin e rrjeteve sociale si X (ish-Twitter) dhe rritjen e popullaritetit të Reform U.K., e cila ka ngritur çështjen e emigracionit në qendër të sondazheve në Britani.

Kritikët: Plani rrezikon jetët e azilkërkuesve

Kritikët paralajmërojnë se një skemë e tillë masive deportimi do të përfshinte kthimin e azilkërkuesve në vende si Afganistani apo Irani, ku ata mund të përballen me përndjekje, tortura apo edhe vdekje.

Por Farage i hodhi poshtë këto shqetësime, duke thënë:

“Ne nuk mund të mbajmë përgjegjësi për mëkatet që ndodhin në mbarë botën. Media nuk po e sfidon më idenë se vendi ynë është në telashe të mëdha,” – tha Farage gjatë një aktiviteti me gazetarë dhe mbështetës të partisë në Oxfordshire, në perëndim të Londrës.

LEXONI GJITHASHTU:

• Farage: Rama ka rënë dakord të marrë mbrapsht të burgosurit shqiptarë në Britani
• Rama vijon replikat me Farage: Le të caktojmë datën kur të vish në Shqipëri