Nis dëbimi i sirianëve, pas pezullimit të aplikimeve për azil vjen largimi

Qeveria në Austri ka deklaruar të martën se ka nisur përgatitjet për programin e dëbimit dhe riatdhesimit të shtetasve sirianë që jetojnë në vend.

Vendimi pason atë të një dite më parë për pezullimin e aplikimeve për azil nga refugjatët sirianë dhe vjen pasi miliona sirianë mund të kthehen në vendlindje pas rënies së regjimit të Bashar al Assad.

Ministria e Brendshme deklaroi se shqyrtimi i statusit të rreth 40 mijë sirianëve të cilëve u është mundësuar qëndrimi në 5 vitet e fundit ka nisur.

“Ajo që po përgatitet tani është trajtimi me prioritet i rasteve. Në fokus do të jenë ata individë që janë bërë kriminelë, që nuk duan t’i përshtaten vlerave kulturore në Austri, apo ata që nuk duan të punojnë dhe jetojnë përmes përfitimeve sociale. Këta do të jenë pa asnjë dyshim prioriteti i këtij programi”, deklaroi Gerhard Karner, ministër i Brendshëm i Austrisë.

Të hënën, disa dhjetëra mijëra sirianë mbushën rrugët e Vjenës për të festuar rënien e Assad. Shumë prej tyre valëvitnin flamurin sirian dhe shprehnin gëzim.

Rreth 95 mijë sirianë jetojnë në Austri, shumica e të cilëve mbërritën gjatë krizës së viteve 2015-2016.

Nisja e konfliktit në vitin 2011, e nxitur nga pakënaqësia popullore dhe nisma pro-demokracisë, Pranvera Arabe, detyroi rreth 14 milionë sirianë të linin vendin.

LEXONI GJITHASHTU:

• Kush është lideri i rebelëve që mund të marrë pushtetin në Siri, e shkuara e errët
• Regjimi i Assadit në Siri, Arapi: Pas 41 vjetësh fitoi lirinë piloti që nuk pranoi…