Nëntë të pandehur janë paraqitur në gjykatë në Frankfurt të Gjermanisë, nën akuzën e komplotit për rrëzimin e qeverisë.
Ngjarja tronditi vendin në vitin 2022. Tani, rreth 260 dëshmitarë pritet të marrin pjesë në proces.
Numri i lartë i të pandehurve, avokatëve dhe mediave që po ndjekin çështjen ka bërë që procesi të mbahet në një godinë të posaçme.
“Gjykata nuk kishte ambientet e duhura për këtë proces. Nuk kishte një sallë që do të ishte e përshtatshme sa i takon masave të sigurisë që do të merreshin dhe numrit të lartë të njerëzve që do të ndiqnin procesin. Ky proces arrin në një shkallë me të cilën Gjykata e Lartë Rajonale nuk është përballur më parë. Kemi një gjyq me 9 të pandehur, që aktualisht kanë 25 avokatë mbrojtës. Gjithashtu kemi një padi që shkon përtej asaj që kemi parë deri më sot”, tha Gundula Fehns-Böer, zëdhënëse e Gjykatës së Frankfurtit.
Të pandehurit përfshijnë Hajnrih Princ Rojs, i cili përmes grupit të tij synonte të instalohej si lideri i ri i përkohshëm i Gjermanisë; një gjyqtar, një ish-ligjvënës nga radhët e AFD-së, si dhe disa ish-oficerë të ushtrisë gjermane.
Shumica e tyre akuzohen se i përkasin një organizate terroriste. Gjyqi që nisi ditën e martë është i dyti i tre procedimeve madhore ndaj personave që nuk njohin autoritetin e Republikës Federale Gjermane. Një tjetër proces nisi në prill në Shtutgart, ndërsa një i tretë pritet të nisë në Mynih në qershor.
LEXONI GJITHASHTU:
- Frika nga lija e majmunit, kompania gjermano-daneze rrit prodhimin e vaksinës
- Propozimi i Kosovës për Asocacionin, Franca, Gjermania dhe Italia letër Kurtit
