Nis punimet Kuvendi Kombëtar i PD, Basha: Shqipëria u plaçkit në kohën e COVID

Lulzim Basha, kreu i Partisë Demokratike, akuzoi qeverinë në nisje të punimeve të Kuvendit Kombëtar të PD-së se në kohën e pandemisë ka plaçkitur popullin.

Sipas tij qeveria, së cilës iu referuar si “regjimi”, i ofroi qytetarëve vetëm “gjoba e propagandë”, ndërkohë që me tenderë sekretë “u pasuruan vetëm klientët e qeverisë” para shëndetit të njerëzve.

“Edhe kur fatkeqësia goditi Shqipërinë, ata nuk e ndalën babëzinë e tyre,” – deklaroi kreu i PD-së.

Sipas Bashës, këto nuk janë vetëm rezultatet e analizave të Partisë Demokratike, por dhe rezultate të raportit paraprak të OSBE/ODHIR dhe të Delegacionit të Asamblesë Parlamentare të Këshillit të Europës.

“Vjedhja më e madhe në historinë e pluralizmit”, kështu e cilësoi kryedemokrati rritjen, sipas tij, të paprecedentë të fletëve të pavlefshme të votimit si pasojë e hileve.

Në Kuvendin Kombëtar të Partisë Demokratike ai deklaroi se çdo person pa identitet politik e pa kontribut shoqëror u ngjit në rangun e më të votuarve, ndërsa theksoi se gara ishte e pabarabartë.

Sipas Bashës, PD doli nga kjo “masakër zgjedhore” me kokën lartë dhe me programin më të mirë të hartuar në këto 30 vite.

Nga ky Kuvend pritet të zgjidhen anëtarët e Këshillit Kombëtar dhe të votohen ndryshimet në statutin e partisë.

LEXONI GJITHASHTU: 

• Kuvendi Kombëtar i PD-së, demokratët do të zgjedhin 300 anëtarët e Këshillit Kombëtar
• Kadilli: Shpresoj që ndryshimet në statut të bëhen realitet në Kuvendin Kombëtar
• 35 projektligje që nuk u miratuan, nismat që presin kuvendin e ri, mes tyre edhe amnistia fiskale