Ka qenë një e diel e ngarkuar për dy rivalët në zgjedhjet presidenciale amerikane, kur kanë mbetur më pak se 24 orë nga votimi i së martës.
Si demokratja Kamala Harris edhe republikani Donald Trump kanë mbajtur evente elektorale në shtetet kyçe, që shihen gjerësisht si ato që do të vendosin rezultatin e zgjedhjeve.
Në Miçigan, Harris u zotua se do të kthejë faqen e një dekade politike të kaluar mes frikës dhe përçarjes. Ajo e cilësoi procesin e së martës si një nga zgjedhjet më të rëndësishme të jetës dhe shprehu bindjen se do ta fitojë garën.
“Ju e njihni shprehjen tonë: nuk ka kthim pas! Ne nuk do të kthehemi pas. Ne nuk do të kthehemi pasi lufta jonë është një luftë për të ardhmen”, deklaroi Harris.
Trump ndërkohë u shpreh besimplotë për fitore gjatë mitingut në Karolinën e Veriut.
“Sepse ne udhëheqim. Ajo që duhet të bëjmë është të dalim të martën dhe të votojmë, të votojmë dhe të votojmë. Ne do të fitojmë”, tha Trump.
Ekspertët e sondazheve sugjerojnë megjithatë se Trump dhe Harris mbeten kokë më kokë në Karolinën e Veriut dhe 6 shtetet e lëkundura.
Në një tubim të mbajtur më herët në Pensilvani, Trump iu referua sërish retorikës së manipulimit të votave, duke thënë se kjo gjë po ndodhte në këtë shtet.
