Nisje e mbarë për Zvicrën/ Helvetët marrin 3 pikët, Shaqiri e Embolo protagonistë

Ndeshja debutuese në botërorin e Katarit ka rezultuar e suksesshme për kombëtaren e Zvicrës e cila ka marrë 3 pikët e para. Bril Embolo ishte heroi i helvetëve, i cili shënoi golin e vetëm të takimit në pjesën e dytë.

Pjesa e parë u dominua nga Kameruni, ndërsa pa zviceranët të cilët nuk goditën asnjëherë në portën kundërshtare.

E udhëhequr nga shqiptarët Xherdan Shaqiri e Granit Xhaka, Zvicra duhej të ndryshonte diçka në fraksionin e dytë.

Në minutën e 48’ ishte Shaqiri me një pasim që dërgoi drejt qendrës ku gjeti të zbuluar Embolon, me këtë të fundit që e shtyu topin drejt rrjetës. 25-vjeçari që aktivizohet tek Monaco nuk e pati aspak të vështirë të kalonte në avantazh të tijin.

Me kalimin e minutave, Zvicra u mundua të merrte në dorë frerët e lojës edhe pse e pati të vështirë pasi kundërshtarët kishin një përgatitje fizike të admirueshme.

Pavarësisht tentativave rezultati mbeti i pandryshuar, ndërkohë Kameruni zbret në vendin e fundit të grupit G me zero pikë, ndërsa Zvicra në të parin me 1 fitore. Ndërkohë Embolo bëhet lojtari i parë që i shënon vendit të lindjes në një kampionat botëror.

LEXONI GJITHASHTU: 

• Shqiptarët jashtë për festa, operatorët turistikë: Ka mungesë marketingu në vend
• OBSH: Popullsia po plaket, do rriten kostot e kujdesit për moshat e treta