Fundjava nisi me re pluhuri për banorët e disa vendeve të Evropës Perëndimore pasi një sasi jashtëzakonisht e lartë e grimcave të pluhurit nga Afrika e Veriut mbërriti nga Saharaja.

Parashikuesit e motit në Gjermani presin që pluhuri të jetë i dukshëm që në Pashkë. Më së shumti do të jetë në Francë, Gjermani dhe Zvicër, sepse qielli mbi ato vende tashmë është bërë portokalli.

Tashmë ka mbërritur pluhuri i Saharasë, të cilin mund ta shihni në renë e verdhë në ajër, tha Christian Herold, meteorolog në Shërbimin Meteorologjik Gjerman, shkruan DW.

“Spiegel” raporton gjithashtu se pluhuri në Gjermani do të jetë i dukshëm edhe të dielën e Pashkëve.

Midis 60 dhe 200 milionë tonë pluhur nga Saharaja bie në Evropë çdo vit. Ndërsa grimcat më të mëdha dhe më të rënda bien shpejt përsëri në Tokë, grimcat më të vogla ndonjëherë mund të udhëtojnë mijëra kilometra.

Autoritetet në vendet më të prekura nga pluhuri po paralajmërojnë për ndotjen dhe cilësinë e ajrit.

Shërbimi zviceran i “AirCHeck monitoring” bëri me dije një nivel të lartë ndotjeje në korridorin që shtrihet nga jugperëndimi në verilindje të vendit.

Roman Broglie, një meteorolog me transmetuesin zviceran SRF, tha se u regjistruan rreth 180,000 tonë pluhur, që është rreth dyfishi i sasisë së stuhive të ngjashme të rërës në vitet e fundit.

LEXONI GJITHASHTU:

• Pluhuri afrikan, Guri: Duhet të ishte parashikuar, qytetarët të painformuar
• A do rikthehet pluhuri afrikan në Shqipëri? Flet Hakil Osmani